Min Hlennak

Biahalnak:
Misual pa nih minung pali a tlaih hna. A tlaihmi hna cu; Lian Lian, Iang Iang, Rem Rem le Sui Sui an si. Bawm chung ah a khumh dih hna i an lu lawng a lang. A hmai bik ah Iang Iang, a changtu ah Rem Rem, a hnu bik ah Sui Sui a chiah hna i Lian Lian cu innkhan dang ah a chiah. An pali lakah pahnih cu lukhuh sen a khuhter hna i, pahnih cu lukhuh raang a khuhter hna. Asinain zeibantuk rong (color) dah an kan khuh timi ahohmanh nih an hngal lo. Iang Iang cu a hmai bik ah a chiah caah ahohmanh a hmu kho hna lo, a ruang cu hnulei i her khawh a si lo. Rem Rem cu a pahnihnak ah a chiah caah Iang Iang a lukhuh a hmuh khawh, nain amah lukhuh cu aa hmu kho lo. Sui Sui cu a hnu bikah a ummi a si caah amah bel nih cun Rem Rem le Iang Iang lukhuh a hmuh khawh. Zeibantuk rong dah an i khuh timi zong a hngalh. Nain amah lukhuh cu aa hmu kho ve lo. Lian Lian cu innkhan dang ah a um caah a ho lukhuh hmanh a hmu kho lo, amah lukhuh zong. Misual pa nih cun hitihin a ti hna; «Nan zapi in lukhuh kan khuh dih hna. Minung pahnih cu a senmi kan khuh hna i minung pahnih cu a raangmi kan khuh hna. Nan lakah mi pakhat nih a lukhuh rong a chim khawh sicun nan luat lai. Nain a palh sicun kan thah dih hna lai. Voikhat lawng chimnak nawl a ngei. Ahohmanh bia i ruah le i chimh khawh a si lo.» tiah a ti hna. Cuti a chim dih 10minutes hnu ah mi pakhat nih a lukhuh rong a hngalh i a chim. A chim dik caah an luat dih. Ahodah a lukhuh rong a hngaltu asi i, zeitin a lukhuh rong cu a hngalh khawh? 

Aphi:
Iang Iang le Sui Sui karlak i a ummi Rem Rem nih a hngalh.  A hngalh ning cang cu hitihin a si. Misual pa nih bia a chim dih tikah Iang Iang le Sui Sui nih an lukhuh rong an chim kho lo. A ruang cu Iang Iang ca ahcun a ho lukhuh hmanh a hmuh khawh lo caah amah lukhuh rong hngalhnak lam a um lo. Sui Sui bel cu a hnu bikah a ummi a si ko nain amah lukhuh kha a hngal kho ve lo. A ruang cu Iang Iang lukhuh le Rem Rem lukhuh kha an rong aa dang. I khat hna sehlaw tahchunnak ah a senmi veve si hna sehlaw a senmi pahnih a si cang i ka lukhuh hi a raangmi a si ti kha a hngalh lai. Nain an lukhuh rong aa dan tikah khua a ruahmi cu misual pa nih hin a sen a raang a sen a raang, a sen ti in a chang chang in a kan chiah khawh, asilole a sen a sen, a raang a raang ti in pahnih pahnih in a kan chiah khawh ti kha a ruat. Cu tikah amah lukhuh rong kha a chim kho ve lo. Rem Rem nih cun a hnu bik a ummi Sui Sui nih a chim te ttheo lai a ti nain a chim lo tikah khua a ruahmi cu «Aw, keimah le ka hmai i a ummi Iang Iang hi kan lukhuh rong aa dang tinak a si. I dang hlah sehlaw aa lomi pahnih a um cang lai i Sui Sui nih a lukhuh rong a chim cang lai si. A chim lonak a ruang hi keimah lukhuh le Iang Iang lukhuh aa dan caah a si» a ti i cuticun a lukhuh rong cu a hngalhnak le a chim khawhnak cu a si.


————————

Biahalnak:
Inn dot 50nak ah pakhat pa zungrian a ttuan. Zung in inn lei a ttin lei ahcun dot 50nak in dot 1nak tiang sehhlei (elevator) in a ttum kho, nain zung a kai lei ahcun dot 45nak tiang lawng a kai kho i, dot 45nak in cun sehhlei in a chuak i ke in dot 50nak tiang a kai. Ke in hei kai chap khi a huat tukmi le a huam lo tukmi a si. Zeiruang ah dah ke in dot 45nak in dot 50nak tiang a kai leng mang? 

Aphi:
A niamtuk i dot 50nak kainak hmehnak kha a phan lo. A ttum lei bel ahcun dot 1nak ttumnak cu a tang bik ah a um i a hmeh khawh. 



Biahalnak:
Lamhlapi in cun piang tein hmuh khawh a si, nain naih tein cun hmuh khawh a si lo. Zeidah a si?

Aphi:
Chuncha

————————

Biahalnal:
Na cawk i a nak, na hman i a sen, na hman dih in a pawl (grey). Cucu zeidah a si?

Aphi:
Meihol

————————

Biahalnak:
Pum ka ngei, hngawng ka ngei. Nain lu ka ngei lo. Zeidah ka si?

Aphi:
Cocacola dur
————————

Biahalnak:
Nan inn le nan innpa hna inn a kâng i rian rang in Ambulance pahnih an ra. Sicun nan inn a kângmi mei maw an thah hmasa lai nan inn pa inn a kângmi dah?

Aphi:
Zeihmanh an that lai lo. A ruang cu Ambulance cu mei that tu an si lo. 

————————

Biahalnak:
Halkha lei panh in motor saikel in na kal. Lam pahnih aa tthen i orhlei lam maw ka zulh lai kehlei lam timi na hngal lo. Orhlei lam ah pa pakhat a dir, cun kehlei lam ah pakhat a dir ve. Mah hna pa pahnih chungah pakhat cu lih a chim pengmi a si i, pakhat deuh cu biadik a chim pengmi a si ve. Asinain mizei deuh dah lihchim a si i mizei deuh dah biadik a chimmi a si ti kha na hngal lo. Voikhat lawng biahal khawhnak nawl na ngei. Sicun Halkha lei a kalmi lam cu mah lam hi a si tiah na hngalh khawhnak dingah zeitin in dah bia na hal hna lai? 

Aphi
Na hal hna dingmi biahalnak cu anmah pahnih lakah pakhat deuh, a fawinak cun orhlei i a dirmi ti ko usih amah kha hitihin na hal lai: «Ka kawi, kehlei i a dirmi pa khi Halkha lei a kalmi lam hi zeideuh dah a si? tiah hal ning law a ka sawhpiak dingmi lam hung ka sawhpiak tuah» tiah na hal lai. 

Hrilhfiahnak:
Na halmi pa kha lih a chim pengmi a si pek biatak a chim pengmi a si pek, mi zei an si poah ah Halkha lei i a kal lomi lam kha an sawh piak lai i, an sawh piak lonak lam paoh kha Halkha lei i a kalmi lam a si lai. A ruang cu na halmi pa kha tahchunnak ah lih a chim pengmi sisehlaw a cung i biahalnak na van hal tik ah khan amah nih a hngalhmi cu BIATAK  a chim pengmi pa nih cun Halkha lei a kalmi lam kha an sawhpiak lai ti kha a hngalh. Cucaah an sawhpiak dingmi lam kha sawh piak loin an sawhpiak lo dingmi lam kha an sawhpiak lai. Cu bantuk tthiam tthiam in na halmi pa kha biatak a chim pengmi a rak si zongah a cung biahalnak na van hal in amah nih a hngalhmi cu LIH CHIM pa nih an sawhpiakmi lam kha Halkha lei a kal lomi lam a si ti kha a hngalh. Cucaah biadik a chimmi a si caah lih chim pa i an sawhpiak dingmi lam kha an sawhpiak lai. Cucaah mi zei na hal hna zongah Halkha lei i a kal lomi lam kha an in sawhpiak lai i, an in sawh piak lonak lam kha Halkha lei a kalmi a si ti na hngalh khawh lai. 

—————————— 

Biahalnak:
Khengkur chungah thei pum nga a um. Minung pa an ra i pakhat cio an i lak. Nain khengkur chung ah thei pumkhat a taang. Zeitin a si khawh? 

Aphi:
Minung pali nih thei kha an i lak cio i a panganak pa nih a kheng in a lak. Mah ruang ah khengkur chungah pumkhat a umnak a si.

———————————— — 


Biahalnak:
Tarpa a ngakchia lio ah a thi. Zeitin a si khawh?

Aphi:
A min ah tarpa a si i a ngakchiat tein a thi.

—————————

Biahalnak:
Ruahpi sur lakah angki a senmi le a hringmi na chiah tti hna. Zeitin dah angki an um?

Aphi:
An cin

——————————

Biahalnak:
Halkha in Yangon tiang meng tampi a simi ah ka kal. Chuk ka zuang, cho ka kai. Asinain ka cawl lo, ka umnak zong kaa tthial fawn lo. Zeidah ka si? 

Aphi:
Motor lam. 
----------------------------