Bupi Lentecelhmi

A tang lentecelhnak pawl hi hawikom he maw asilole mino i tonnak le i hawikomhnak ah i celh a nuam ngai ngaimi an si. Aa ttial ning a fiang lomi a um sicun Facebook ah «Ro Lan Thang Fambawl» ah hal khawh ka si.

SUM SUM SEK ( Rock, paper, scissor) 

Tuahning 1nak:

• Level 1 in 4 tiang na tthen lai
• Level 1: Utlak
• Level 2: Va
• Level 3: Minung
• Level 4: Siangpahrang

Tuahning 2nak:

• Nan zapi in level 1 (utlak) nan si dih hmasa lai. 
• Utlak bantuk in nan per cio lai i na ton hmasabikmi minung he "sumsum sek" nan tuah lai. 
• Na tei a si ahcun level 2 (va) ah na kai lai i, va a zuang liomi bantuk in na kut na tuah lai. 
• Na teimi kha cu level 1 a si tthiam tthiam ko lai.
• Teinak a hmutu paoh kha va nan si lai i va le va pawl kha sumsum sek nan tuah ve hna lai. Level 1 pawl zong kha level 2nak an kai khawhnak hnga an tuah peng ve lai. 
• Level 2 (va) a simi pawl kha sumsum sek nan tuah lai i teinak a hmumi kha Level 3 ah nan kai lai. A sungmi kha Level 1 (utlak) ah an ttum tthan lai. 
• Level 3 (minung) pawl kha normal tein nan kal lai. Normal tein a kal vemi (level 3) pawl he pakhat le khat sumsum sek nan tuah tthan lai i teinak a hmumi nih nan kut nan thlir lai i "Siangpahrang" nan ti lai le nan i din lai. Level 3 i a sungmi pawl kha Level 2 ah an ttum tthan lai. 
• Siangpahrang a simi paoh kha nan chuak thluahmah hna lai i siangpahrang dirhmun a phan manh lomi kha an sung lai. 
• Hi game cu minung tam nawnpi he i celh a nuammi a si. 
• I celh lio ah hrokhrol lo ding. Sungh ahcun sungh, awn ahcun awn. 

——————————————

ZU, ZAWNG

• Group pahnih in na tthen hna lai. Tahchunnak ah minung 10 nan si ahcun 5 veve in. 
• Hruaitu nih Group A le Group B kha min na pek veve hna lai. Tahchunnak ah: Group A kha Zawng, Group B kha Zu.
• Artlang tein "Group A" kha na tthutter hna lai. 
• Artlang tein "Group B" zong na tthutter ve hna lai. 
• Group A le B kha karkhat hrawng i hlat in an tthu lai i an hnu an i chit veve lai. 
• Hruaitu nih "Zawng" ti a chim ahcun Zawng pawl kha an zam lai i, Zu pawl nih an zam manh hlan ah an keng tawngh an i zuam lai. 
• Hruaitu nih "Zu" a ti ve ahcun Zu pawl kha zam an i zuam ve lai i zawng pawl nih an keng tawngh an i zuam ve lai. 

——————————————

HI, HA, HU

• Hi, Ha, Hu cu thing tan/hau he aa lo. 
• Nan zapi in nan dir kual dih hna lai. 
• Hruaitu nih "Hi" a ti lai i phungki thlacam bantuk khin a kut a komh lai i minung pakhat a sawh lai. 
• A sawhmi minung nih "Ha" a ti pah in a kut pahnih kha phungki thlacam bantuk in a komh ve lai i cunglei ah a thlir lai. 
• A kut a thlirtu pa a kehlei le a orhlei i a dirmi hna pahnih nih a kur a thlirmi pa cu thing an haumi bantuk khin "Hu" an ti lai i a paw zawn ah thing hau in an hau lai. 
• A kut a thlirmi pa nih cun a duhmi minung paoh kha "Hi" a ti lai i a hei sawh ve hna lai. A sawhmi pa nih "Ha" a ti ve lai i a kut hnih in a thlir ve lai. A kehlei le orhlei minung pahnih nih "Hu" an ti lai i a tai zawn ah an kut hnih veve in an hau ve lai. Cun a kut aa thlirmi nih midang kha "Hi" a ti ve tthan lai i a sawh tthan ve lai. Cu ti cun tuah peng a si lai.
• Hi, Ha, Hu, chim aa palhmi paoh an sung lai. An chimmi a dik ko zong ah an tuahmi an palh ahcun an sung fawn lai. 
• Duhsah tuk in tuah khawh a si lo. 
• «Hi: mi sawh
• Ha: kut thlir
• Hu: an paw zawn in hau

—————————————— 

Ka uar:

Tthutnak ah nan zapi in nan tthu lai. Minung pakhat tthutnak a ting lai lo. Tahchunnak ah minung 20 nan si ahcun tthutnak 19 lawng a si lai. Tthutnak a ting lomi kha a dir lai i tahchunnak ah: "Angki sen aa hrukmi ka uar hna." a ti lai i angki sen paoh an tho lai i tthutnak an i thleng lai. Thutnak a ting lomi caan a si ve lai i amah nih a duhmi paoh kha "............ ka uar hna" a tive lai i a chimmi a ngeimi paoh kha an tthutnak an i thleng ve lai. A chimtu zong kha tthutnak an i cuh ve a hau. Tthutnak a ting lomi caan a si lai. 

——————————————

Minung, Mithattu, Mithat kawltu

Hruaitu nih mipi pawl kha an zapi in an bokkhup in na bawhter hna lai. Asilole na tthutter hna lai i an lu na khunter hna lai i an mit na chimhter dih hna lai. 

Hruaitu nih an keng ah na kut in na tawngh cio hna lai. 

• Voikhat lawng na tawnghmi cu minung sawh sawh an si lai. 
• Voihnih na tawnghmi cu mithattu an si lai.
• Voithum na tawnghmi hna cu mithat kawltu an si. 

A za na ti in an mit na auter hna lai i na dirter hna lai, cun na chawhter hna lai. 

• Mithat tu nih a tuah dingmi cu mithah a si. A thahdan hna cu mit ttheh in a si lai. An i chawh lio ah pakhat le pakhat an mit an i zoh cio lai. 
• Mithat tu nih a mit a ttheh hnawhmi hna paoh an thi lai i an tthu lai. Dir in an i chawk tthan ti lai lo. 
• Mithat a kawltu nih a hodah mithattu a si ti kha hngalh aa zuam ve lai. 
• Mi that kawltu nih mithat tu a hngalh a si ahcun a kal hnawh lai i a kut in a sawh lai le "Aha, nangmah na si." tiah a ti lai. 
• A sawhmi minung a dik a si ahcun mithat kawltu a awng lai. Nain a dik lo sicun mithat tu pa a awng ve lai.  
• Mi sawh sawh cu zeihmanh an chim lai lo. Dai tein an i chawk sawh lai i mithat tu nih a mit a ttheh hnawh hna tik lawng ah an thi lai i an tthu lai. 
• Hi lentecelhnak cu mithat tu nih tampi in mi thah khawh aa zuam lai i, mithat kawltu nih mithattu kawl zok zok aa zuam ve lai. 
• Mithattu nih mithat a sinak a langhter lai lo.
• Mithat a kawltu zong nih mithat tu a hngalh hlan lo mithat kawltu a sinak a langhter ve lai lo. 

——————————————

Bawlung cheh: 

• Bawlung a hme nawnmi le a nem nawmmi nan hman lai. 
• A ri kaupi in na suai lai i a ri leng chuah khawh a si lai lo. 
• Hall chung ah nan i celh a si ahcun hall inn chung kha a ning pi in hman khawh a si. 
• Van lei ah bawlung cu nan hlirh lai i vawlei a tlak in a la hmasa bikmi nih midang a cheh hna lai. 
• Mi a cheh hna in bawlung a la tu nih midang a cheh tthan ve hna lai. 
• Bawlung aa kenmi cu lamhla kal khawh a si lo. Kar thum pin a kar kho lo. Nain bawlung aa ken lomi cu an duhnak paoh an kal kho, nain a ri leng an chuah ahcun an thi lai. 
• Bawlung nih a khenmi hna paoh an thi lai. 
• Nain bawlung in an in cheh tikah vawlei a tlak hnu ah an khen cun na thi lai lo. 
• Cun bawlung in an in cheh tikah vawlei a tlak hlan ah na tlaih khawh a si ahcun an cheptu a thi lai. 
• Na tlaih khawh lo i an khen fawn ttung ahcun na thi ve lai. 

Bawlung cheh hi phundang zongin i celh khawh a si. 

Tahchunnak ah group A le B in na tthen hna lai. Group A kha kehlei ah an dir lai i group B kha orhlei ah an dir ve lai. Bawlung cun an i chep lai i khenmi paoh an thi lai. Zulh phung cu a cung deuh i bantuk khi a si. 

——————————————

• Alan lak (Capture flag) 

Alan pahnih in na ser lai. Alan a silomi thildang zong hman khawh a si. 

Group pahnih in na tthen hna lai i alan pakhat veve na pek hna lai. Group A le B an alan kha  aa hlat pi veve in na chiah hna lai. Group A nih Group B an alan kha lak i an alan umnak ah chiah an i zuam lai. Cu bantuk cun Group B zong nih an i zuam ve lai. Group A chung in pakhat nih Group B an alan a lak tikah Group B nih alan a latu kha tawngh khawh an i zuam lai. An tawngh khawh a si ahcun second pahra chung an tawnghnak hmun ah khan a thi lai. Cu tikah Group B nih khan an alan kha a umnak ah an va khirh tthan lai. Asinain an khirh manh hlan ah alan a putu/khirhtu kha Group A nih an tawngh manh ve a si ahcun an tawnghnak hmun ah khan alan kha a chiah ta ve lai i amah zong cuka hmun ahcun second pahra chung a thi ve lai. Second pahra chung kha khoika hmanh kal khawh a si lo. Cu tikah Group A nih cun alan cu an alan umnak lei ah tlikpi an i zuam ve lai. Cu bantuk tthiam tthiam in Group B nih Group A an alan cu lak an i zuam ve lai. Alan lak tikah pakhat le pakhat i chanh khawh a si lo. A latu nih an alan umnak tiang an chiah hrim hrim a hau. Cun an alan umnak an phanh lai te ah rang deuh seh ti in a cheh in cheh khawh a si fawn lo. A kut hrim hrim in a chiah a hau. 

—————————————— 

RALKAP, CAKEI, BAWI

• Hi lentecelhnak cu "Sumsum sek" he aa lo. 
• Ralkap nih cakei a tei, cakei nih bawi a tei ve, bawi nih ralkap a tei ve.  

• Group pahnih in na tthen hna lai.

• Muihmai piah ning:
• Cakei:  cakei mi kheuh bantuk in a kut a tuah lai. 
• Ralkap: Ralkap meithal kah bantuk in a kut a tuah lai.
• Bawi: A kut a thlir lai. 

• Group A le Group B chungin pakhat veve an hung chuak lai. 
• Hmaitonh in an dir lai i an kut hnih in an i tlai lai. 
• Khat, hnih, thum - an ti lai i ralkap, cakei le bawi chungin an duhmi an tuah lai. 
• Tahchunnak ah mi pakhat nih cakei a tuah ahcun a kut hnih in aa chuah lai i kheuh a timh lai. 
• Pakhat deuh nih ralkap a tuah ahcun ralkap meithal kah bantuk in a kah lai. 
• Cakei cu ralkap nih a tei caah cakei a tuahtu kha a chuak lai i amah aiawh ah a group chungin midang an hung chuak ve lai. 

——————————————

TTHUTDAN I CUH 

Group pahnih in na tthen hna lai. 

Tthutdan pakhat kha lam hla nawn ah na va chiah lai. 

Group A le B chungin na duh zah na dirter hna lai. 

A dirmi pawl nih an kepi an i tawngh lai i voi 15 an i ving lai. Cun na chiahmi tthutdan lei ah va tlik i tthut hmasa an i zuam lai. 

A tthu hmasa paoh an awng lai.

Hi lentecehnak cu phundang deuh zong in tuah khawh a si. Tahchunnak ah tthutdan pahnih kha lam hla nawn ah na va chiah lai. Minung pahnih cu an kepi tawngh in voi 15 na vinghter hna lai i voi 15 an tlin in an va tli lai i tthutdan cu an va tawngh lai. An hung kir zok zok lai i an umnak an phanh in anmah le group chung in pakhat veve an hung chuak lai i an tuah ve lai. An group zapi in a dih hmasa paoh nih teinak an hmuh lai.

——————————————

THIL TLAU KAWL:

Group pahnih in na tthen hna lai. Group tthen lo zong in i celh khawh a si. Minung pahnih na chuahter hna lai i an mit na tuam hna lai. Cun thil pakhat kha na duhnak ah na chiah lai i mah na chiahmi cu kawl an i zuam lai. A hmu hmasa paoh an awng lai. 

—————————————— 

Dur Thluk 1:

• Dur ah ti tlawmpal na rawn lai
• Dur kha lam hla deuh ah na va chiah lai
• Group A le B chungin pakhat veve na chuahter hna lai. 
• An tai ah hri in na ttem hna lai
• Hri a par ah thil pakhat a rit pahmi na thlaihnlai (apple, banhla tibantuk zong thlaih khawh a si)
• Dur thlu tu ding cu "Khat, hnih, thum" na ti lai i dur lei ah an va tli lai i dur kha voi 15 an hel lai. 
• An hel dih in dur kha an i thlaihmi thil in tuk i thluk khawh an i zuam lai. An kut in i bawmh khawh a si lai lo. 
• An thluk khawh in an hung kir zok zok lai i anmah le group cio kha an i thlaihmi kha an pek hna lai i an i thlaih dih in dur lei ah an va tli ve kai. 
• Voi 15 an hel ve lai i kut i bawm loin thluk khawh an i zuam ve lai. 
• A dih hmasami group paoh an awng lai. 

——————————————

Thei

• Thei phun li in na thim lai (hai, dingkok, khuhlu, metei) 
• Nan tthu kual hna lai
• Minung 20 nan si ahcun minung 5 kha hai, 5 kha dingkok, 5 kha khuhlu, a taangmi 5 kha metei. 
• Hruaitu nih "Metei" na ti ahcun metei paoh paoh tthuttnak an i thleng lai. 
• Metei le hai na ti ahcun metei le hai paoh paoh tthutnak an i thleng ve lai. 
• Na chimmi min paoh tthutnak an i thleng lai.
• Hi lentecelhmi cu awn le sungh a um lo. Nain a nuam ngai ngaimi a si.

——————————————

MIN CHIM LAM

Min chim lam cu "Zero zero" timi i celhmi he khan aa khat pah. 

Nan zapi in nan dir lai. Hruaitu nih a thawk lai. Hruaitu nih a min a chim pah in a duhmi a tuah lai. Cun aa celh vemi chung in a duhmi an min kha a chim lai i a tuah ding kha a hmuhsak lai. Tahchunnak ah Lian Lian nih: "Lian Lian, Lian Lian." a ti pah khin a ke a cawi lai. Cun "Lian Lian, Sui Sui" a ti pah khin Lian Lian nih cun a ttawk a lei lai. Sui Sui nih khan "Sui Sui, Sui Sui" a ti pah khin a ttawk aa lei lai i "Sui Sui, Ngun Ngun" a ti pah khin utlak per in a per lai. Ngun Ngun nih aa thawh ve lai i "Ngun Ngun, Ngun Ngun" a ti pah in utlak per in a per ve lai i "Ngun Ngun, Pa Ceu" a ti pah khin a lu le taw aa let lai. Ti cun Pa Ceu nih "Pa Ceu Pa Ceu" a ti pah khin a lu le taw aa let ve lai i a cunglei bantuk khin midang an tuah ding caah a tuah pah khin a tuahtu ding min a chim ve lai. 

—————————————— 

Volleyball

• Group pahnih, pathum asilole pali tibantuk in nan mi tlawmtam hoih in na tthen hna lai. 
• Anmah le group cio in aa kual in an dir lai. 
• Volleyball na benghter hna lai i a thla hmasami asilole a thla tam bikmi group kha an sung lai. 
• An bengh lio ah Sui Sui nih Lian Lian a chanh sicun Lian Lian nih  Sui Sui chanh nolh khawh a si ti lai lo, midang a chanh hna a hau i a chanhmi hna minung nih khan Sui Sui cu an chanh tthan khawh, nain a tu i a hun chantu Lian Lian kha an chan kho lo. 

——————————————

Kut vingh i chimmi tuah

• Kut vingh i chimmi tuah cu minung pakhat asilole na duh zat minung paoh tuahpi khawh an si. 
• Hruaitu nih na kut na vingh lai i an vingh cio lai. 
• Rang tak tak in nan kut nan vingh lio ah na lu naa tawngh duak pah khin  "Ka paw" na ti lai i an paw an i tawngh khawh an i zuam lai. Mah bantuk cun nan kut nan vingh lai i naa tawnghnak kha anmah nih an i tawng lai lo, na chimmi kha tawngh khawh an i zuam lai. 
• Hi lentecelhmi hi nih a chuak ngaimi a si. 

—————————————— 

ZAWTNAK

• Zawtnak hi i celh a nuam ngaimi a si. 
• Kil li ngei in kaupi in na rin lai. Inn chung kaupi, asilole Hall chung tibantuk ah nan i celh khawh ahcun a ttha chin chin. 
• Zawtnak a ngeimi si dingin minung pahnih pathum hrawng na thim hna lai. 
• Hi nan i celhnak hi hall chungah hei sisehlaw zawtnak a ngeimi kha hall a laika ah na umter hna lai. Minung pawl kha hall vampang pakhatnak in in pahnihnak lei ah tlik an i zuam lai. An tlik lio ah zawtnak a ngeimi nih an dawi hna lai i an tawngh manh hna a si ahcun an zaw ve lai, cun ttuang ah an it lai. An tawngh manh lomi pawl cu khatlei vampang an va phan lai i vampang pawng te ah an um chung cu zawtnak a ngeimi nih an tawng hna lai lo.

• Vampang hram i a dirmi pawl kha an hung kir tthan lai i, a zaw i ttuang ah a itmi pawl kha chanh khawh an i zuam lai. An dawh hna lai i vampang an phanhpi khawh hna a si ahcun an dam lai.
• Nain an phanh hlan ah zawtnak a ngeimi dang nih an tawngh manh hna a si ahcun an zaw ve lai i an it ve lai. 
• Zawtnak a ngei lomi nih a ngeimi pawl kha an duh sicun chanh lo khawh zong a si. 

——————————————

HNU HMAI SIR PER

Hi lentecelhnak cu a bu (group) in i celh ah a nuam ngaimi a si. Hruaitu nih minung zat zoh in a bu bu in na tthen hna lai.

Hnu Hmai Sir Per cu, hnu lei ah per, hmai lei ah per, kehlei

ah per, orh lei ah per a si.

Hruaitu nih an bu ning pi cio in maw asilole, bu khat

chungin minung a duhzat a auh hna lai i a tang lei bantuk in a tuahpi hna lai. (group 1nak tuahter hmasa ding, an dih in an tthu lai i group 2nak nih an tuah ve lai, etc.) Group a chang chang tein na tuahter hna lai. An tuah tikah a tuahtu pawl kha an kut le an kut an i tlai dih hna

lai i an tuah tti hna lai. Tuah lio ah kut i thlah lo ding.

Tuah ding:

Level 1.

Hruaitu nih - «Ka chim ning in chim law, ka chim ning in tuah; Per, hnu lei ah.» tiah na chim lai i, lente aa celhmi group nih ”Per, hnu lei ah”

tiah an ti ve lai, cun hnu leiah an per lai.

Hruaitu nih na chim ning in an chim ve lai, cun na chim ning in an tuah lai. A hnu, a hmai, cun kehlei le orhlei per an thiam dih a si ahcun a tang i a har deuhmi hi an tuah lai.

Level 2. (a har deuh cang)

A tu cu na chimmi he aa ralkah in an chim lai i na chim ning in an tuah lai.

Tachunnak ah «Per, hnu lei ah.» tiah na chim lai i, anmah nih

«Per, hmai lei ah.» tiah an chim lai, nain hnulei ah an per lai.

(Hruaitu nih na chimmi he aa ralkah in an chim lai, nain na chimmi bantuk in an tuah lai.  A hnu, a hmai, cun kehlei le orhlei per an thiam dih a si ahcun a tang i a har deuhmi hi an tuah lai.

Level 3 ( a harbik a si)

A tu cu na chimmi bantuk in an chim lai i, na na chimmi he aa ralkah in an tuah lai. 

Tahchunnak ah 

«Per, hnulei ah.» tiah na chim lai i, anmah nih 

«Per, hnulei ah.» an ti ve lai, nain hmailei ah an per lai.

Chimding eg: 

Per, hnu lei ah

Per, hmailei ah

Per, kehlei lei ah

Per, orhlei ah.

—————————————— 

Siangpahrang i kawl

Hi lentecelhmi hi cu a bu in tthen i, i celhmi a si lo. Zapi in hmun khat ah i celhmi a si. Minung zapi chungin pakhat kha na auh lai i, a pin deuh ah na va dirter lai. Cu na auhmi pa nih cun mi zapi kha an zoh hna lai lo, a hnu lei an chit hna lai. Mah kar ah hruaitu nih ”Siangpahrang na si lai” tiah mi pakhat na kut in na sawh lai i, mah na sawhmi nih cun mipi a hruai hna lai. Tahchunnak ah, a tak aa kheoh lai i, zapi nih nan i kheoh ve lai, cun mah ti a tak aa kheoh lio ah ”Ra cang” tiah a pin deuh ah na dirtermi siangpahrang kawltu cu na auh lai i a ra lai. Ahodah siangpahrang a si hnga, tiah a kawl lai. Mah ti a kawl cuahmah lio ahcun siangpahrang i na thimmi nih cun siangpahrang kawltu nih a hmuh lo kar te ah a tuahmi a thlen lengmang lai. Tahchunnak ah a tak aa kheohmi kha i kheoh peng loin, a lu hna aa muai lai, cun mipi nih nan i muai cio lai. A phun phun a thlen le cangka in nan thlen cio lai i, mah a thlengtu (siangpahrang) kha siangpahrang kawltu nih a hmuh khawh a si ahcun mah siangpahrang kha, siangpahrang kawltu ah aa cang ve lai i, a thar in siangpahrang kawltu na thim tthan lai. Mah na thimmi cu ahodah a si tiah siangpahrang tthing nih a kawl ve lai.

——————————————

AH & UM

Bia kan chim tikah «aaaah» asilole «ummm» tibantuk khi kan telh ttheo tawn.

Mah kha telh ti loin bia chim na zuamter hna lai.

«Ah» le «Um» tel loin minute pakhat chung bia an chim lai.

An chim dingmi cu tahchunnak ah:

• Favorite movie
• Favorite rawl
• Tangka tingkhat ngei law zeitindah na hman lai?
• Na uarmi minta/mintami he nikhat chung um ttinak caan ngei law, zeidah na tuah pi lai.
• Nikhat chung te lawng nunnak caan na ngeih i hngal law, na thih hlaan ah zeidah na tuah ta lai?

Etc.. Nain tuanbia chim a ngah lo.

Group pakhat ah minung pakhat nih a chim lai. A chimmi chungah Ah le Um a talh a si ahcun group dang nih an chim lai. Group pakhat ah voi2 cio asilole voi 3 cio chimnak nawl an ngei lai, nain a peh peh in siloin group pakhat hnu pakhat i chan hnu in anmah caan a phanh tik lawngah chim tthan a si lai.

——————————————

MEI CHUH

Mei lem na ser lai. Mei lem caah  angki zong hman khawh a si ko. An hnu lei an tawkawng ah na tanhter hna lai. Pakhat le pakhat i chuh an i zuam hna lai (a ri na suaipiakmi hna  leng ah chuah khawh a si lai lo. Inn leng ah nan i celh ahcun a ri kha a pum(circle) in na suaipiak hna lai. Inn chung ah nan i celh ahcun a ri suai a hau lo, inn kha hman awk a ttha ko). Mi pakhat nih midang mei kha chuh khawh aa zuam lai. Mei an chuh khawh hna i, Mei a ngei ti lomi pawl cu leng ah an chuak lai. Cuticun ahodah mi mei tambik a chut kho timi na zoh hna lai. An mei an i chuh tikah mah le mei i tlaih khawh a si lo. Tahchunnak ah Lian Lian nih Sui Sui mei a dawh tikah Sui Sui nih a mei a tlai chih lai lo. Midang mei lawng tlaih in chuh khawh a si. Mei tampi a chut khomi kha pakhatnak an si lai. 

——————————————

HNU HMAI TTAWK NGERH

Rang : Hnulei (hnu lei ah an ttawk an pirh lai)

Caw : Hmailei (an hmai lei ah an i euh lai)

Zawng : An ttawk an ngerh lai

Hruaitu nih ”Rang” tiah na chim ahcun an hnu lei ah an ttawk an pirh lai.

”Caw” ti loin ”Uico” tibantuk le saram/sattil dang min zong na chim khawh, nain RANG, CAW LE ZAWNG asi lomi paoh na chim ahcun an pungsan kha an thleng lai lo. Tahchunnak ah «Rang» na ti i an ttawk an pirh, nain «uico» na ti zong ah an ttawk an pirh peng ko lai. Caw le Zawng na chim lawng ah an thlen lai.

Group pakhatnak nih an tuah lai, an palh a si ahcun group pahnihnak nih an

tuah ve lai. Cun an palh ve a si ahcun group 3nak nih an tuah ve lai… etc

——————————————

CAKU TLAIH

Nan zapi in nan tthukual dih hna lai. A laika ah mi pakhat a dir lai i, amah nih caku kutpi kauh te aa put lai. Cungah a hlirh lai i, a hlirh bak in mi pakhat min a chim lai, a min a simi paoh nih mah caku te kha vawlei a phanh hlan ah tlaih khawh aa zuam lai. A tlaitu paoh nih an hlirh ve lai i, midang min an chim ve lai. A tlai kho lo paoh cu an chuak lai, asilole dantatnak pakhat khat pek ding.

——————————————

RUL

Hruaitu nih group in na tthen hna lai. 

An mah le group cio in aatlang tein na dirter hna lai.

An liang le liang cio an i tawng hna lai.

An mit puan in na huhpiak dih hna lai. 

A hnu bik i a dirmi lawng huhpiak a si lai lo.

A hnu bik i a dirmi, mit huh lomi  nih cun a hruai hna lai i, an kal tikah keh lei ah i mer ding a si ahcun, a liang in a tlaihmi pa kha a kehlei liang ah a bengh lai i, cu pa nih cun a liang in a

tlaihmi pa kha a kehlei liang ah a bengh chin ve lai, cuti cun an tuah lai i, a hmai i a

kalmi pa a kehlei liang an bengh in kehlei ah aa mer lai. Orh lei kal an duh

ahcun orhlei ah an i beng hna lai. Cun tthut ding a si ahcun mit huh lomi pa nih a liang in a tawnghmi pa kha tthu ding in a liang in a nam lai, cun a hmai i a ummi kha a nam chin lai i, cuticun a hmaibik a kalmi tiang khin an i nam lai. Cu tikah a hmaibik a kalmi pa nih tthut ding timi kha a hngalh lai i a tthu lai. Holh khawh a si lo.

An tuah ding:

Bawm pakhat ah thil chiah an i zuam hna lai.

An dirnak in bawm cu a hlat nawnpi ah na chiah lai i, cu lei panh cun

an kal lai. Kal an i harh deuhnak hnga an sir lei i a hlat nawnpi ah na

chiah lai. 

Mit huhmi lakah a hmaibik i a dirmi nih thil pakhat khat bawm chung ah khumh ding aa put lai. 

Bawm a umnak an phanh in bawm chung ah a khumh lai. 

Bawm chung i a khumh hmasami paoh nih teinak an hmuh lai. 

Zulhphung: 

A hnu bik i a dirmi mit huh lomi nih an group pawl sinah bia kaa khat

hmanh chimnak nawl a ngei lo.

Kaa khat an chim sual a si ahcun an sung lai.

An group an i thlau sual a si zongah mit i au in i kawl khawh a si lo.

——————————————

FUNGCEH TLIK

Hruaitu nih group in na tthen hna lai. 

Ri pahnih in hlat nawn pi in na rinpiak hna lai. 

An el in fung an i ceh lai i, ri pakhatnak in ri pahnihnak tiang an va tlikpi lai.

Cun an hungkir lai i an hawile kha fung an pek hna lai. An pek hna tikah kut in i pek khawh a si lo. An el in an ceh buin i pek a si lai i, a rak hlangtu zong nih a el in a hlan lai. Cuticun pakhat le pakhat an dih tiang an i pe hna lai. An tlik pah ah an thlak sual a si ahcun an kir tthan lai i, a hramthokin an tuah tthan

lai. A dih hmasami paoh nih teinak an hmuh lai. 

——————————————

KETANG LUH

Hruaitu nih group in na tthen hna lai. 

An mah le group cio in aatlang in an dir lai.

An ke an kar dih lai

Hruaitu nih «Khat, hnih, thum.» tiah na chim in 

a hnu bik a dirmi pa kha an karkalak in a lut lai i a hmaibik a dirmi pa tiang.

Cun a chuah in a hmaibik ah a dir lai i, a hnu bik i a van dir vemi pa nih a

tuah ve lai. Ticun an tuah lai i, a hmaibik a rak dir hmasabikmi pa caan a

phanh tiang.

Tahchunnak ah «Group A» ah minung pahra an si. A hmai bik i a dirmi kha Lian Lian a si. A hnu bik i a dirmi kha Sui Sui a si. Sui Sui cu mi karkalak tang in a hung lut lai i, Lian Lian tang in a hung chuak lai. Cun a hnu bik i a dirmi kha a hung lut ve lai i, ticun an tuah cio lai i, a donghnak ahcun Lian Lian kha a hnu bik ah a tla lai i, Lian Lian nih a van tuah ve lai le a hmai bik a chuah in an dih lai. An dih in a dihmi group paoh cu an tthu lai. 

Ke tang in a lutmi kha a chuah khawh i ttha tein a dir hlan lo le, a dir khawh

in ”Ready” a ti hlan lo paoh cu a hnu bik a dirmi kha mi karkalak tang ah luhnak nawl a ngei rih lo.